Trafaj rakontoj

Paulo Sérgio Viana: Nigra birdo kaj aliaj rakontoj. 124 p. San-Paŭlo 2018, Associação Paulista de Esperanto.

Paulo Sérgio Viana estas konata kiel tradukanto el la portugala, interalie de pluraj verkoj de Machado de Assis, sed ankaŭ kiel verkanto de originalaj poemoj, noveloj kaj eseoj. La jena kolekto enhavas 25 novelojn plejparte mallongajn.

La stilo de la plej multaj eroj estas relative simpla sed ne tro evidenta; la aŭtoro ofte lasas ion ne eksplicita, en la tielnomata subteksto. La verko prezentas plaĉan varion; kelkaj el la noveloj havas trajton lirikan, aliaj proksimiĝas al fabloj, kaj en ankoraŭ aliaj regas etoso parte surrealisma aŭ absurdeta. Kvin tekstoj estas eĉ mikronoveloj malpli ol unupaĝaj. Kelkaj el tiuj estas sufiĉe trafaj, aliaj malpli.

La plej multaj tamen estas rakontoj sufiĉe klaraj, ofte kun fajna psikologia prezento de la personoj. Plej plaĉas al mi kelkaj tiaj, kiel La pano pri la diversaj vidpunktoj de infano kaj plenkreskuloj, Geedza ringo pri hazarda perturbo de ĉiutaga geedza rilato, Lirika kanto pri problemoj de amrilatoj aŭ Litkovraĵo pri rilato al homoj kaj bestoj.

Iuj el la noveloj plaĉas malpli multe pro nekontentiga fino, kiel La tirkesto kaj Ridinda golo. La relative longa novelo Viro kun sia hundo, survoje estas verkita en nekutima stilo, verŝajne adaptita al la surrealisma enhavo. La plej longa novelo havas ankaŭ la plej longan titolon: Foje mi rememoras la ĉokoladojn, kiujn mia patro alportis. Ĝi estas verkita en mi-formo, kaj ĝia mio estas 14-jarulo, pro kio Viana en ĝi elektis simpligitan stilon, iomete kiel en lerneja verkaĵo.

Sume temas pri leginda novelaro en plejparte plaĉa stilo.

Sten Johansson

 

 

Reen al:

Nigra birdo Paulo Sérgio Viana Ĉefpaĝo originala literaturo