| |
La 110a Legokunsido
Tragikomedioj ankaŭ nialande
— “La viro el la pasinteco”—
Sibayama Zyun’iti
Temas pri libro kun 23 noveloj en 101 paĝoj,
de bulgara aŭtoro Julian Modest. Unu el la
noveloj scenas en Budapeŝto en Hungario, sed
temas pri bulgara junulo. Fakte la aŭtoro pasigis
plurajn jarojn tie kaj edziĝis al hungarino, laŭ
la postskriba komento. Sed preskaŭ ĉiu novelo
scenas ie en Bulgario, ĉu urbe ĉu kampare. La
lego-impreso estas, ke preskaŭ ĉiu epizodo povas
okazi nialande en Japanio, se la lokonomoj kaj
personnomoj estus japanigitaj; ekzemple Mina
estus japane Mina kaj Nora estus japane Noriko.
En multaj epizodoj aperas situacio de ‘divorco’;
ĉu la ĉefrolul(in)o eksedz(in)iĝis, ĉu ties
gepatroj apartiĝis, ĉu ties fil(in)o eksedz(in)-
iĝis. Tial la tono de la libro ne estas hela, sed
griza, sed la ĉefrolul(in)o en rezignacio akceptas
vivon tian. Tiel, la tragikomediaj epizodoj estas
proksimaj al ni.
Jen aparte pri kelkaj noveloj.
En “La viro el la pasinteco”, gepatroj divorcis,
kaj filo plenaĝa serĉas la patron en montara
vilaĝo en Rodopo. Ne la rakontfadeno, sed
la sceno alvokis al mi memoron pri mia iama
vojaĝo al Bulgario, precize dirite al la esperanta
staĝejo en Pisanica en Rodopo, kien mi kaj mia
edzino vizitis per buso el Smoljan. Cetere, je
nia vizito, Bulgario estis komunisma ŝtato, sed
tiu ĉi novelo aŭ aliaj okazas en libermerkata
socio, kiel nun estas. Fakte, ĉiuj noveloj en la
libro datis el la jaroj inter 2012 kaj 2014.
“La Iluziisto” estas la plej impresita novelo
en tiu ĉi libro. Iluziisto eks-cirka, divorcinta,
montras sian iluziistan arton, aperigi ion ŝajne
perditan, en montara stacidomo, kiam trajno
ial devis resti longe tie. Tiam knabo petas lin
aperigi sian panjon foririntan, kredante ke
la iluziisto vere kapablas aperigi la panjon.
Eta rimarkigo: se oni transskribus la novelon
kiel japanan aferon; la ĉefrolulo juna forlasas
lernejon jam en “septembro”, sed en la japana
novelo, tio devus okazi jam en “aprilo”:
Septembro estas la komenca monato de
lernojaro bulgara, kio estas aprilo en Japanio.
Reen al:
| |
